وعلى آخر هالزمن صار الحلونجي اسماعيل استاذ ( يعني بشرفكم , شو هالأجيال اللي بدو الحلونجي اسماعيل يخرجها) .
على كلٍ ...
في الصورة الثالثة يظهر أحمد وهو يقرأ الدرس أحمد طالب جميل جداً وذكي أيضاً ..... انتبهوا للطفل من خلفه وعلامة النصر التي تعود أطفالنا على إظهارها عند توجيه أي كاميرا ناحيتهم . على فكرة بكرة راح أربيه لهالولد , إلا إذا حد من المدونين الزملاء بيتواسطله ...
في الصور التالية يظهر واضحاً صرح الشهيد الفلسطيني الذي يعد أهم معلم يميز مخيم الدهيشة .
في الصور الباقية , ينتظر الطلاب بشغف المبارة النهائية في كرة القدم بين الصف التاسع أ والثامن ج ...طبعاً انتهت لصالح الصف التاسع 4/1
حضر المبارة أكثر من ألف طفل وشاب ... وخرج الطلاب بعد المبارة إلى الشوارع فرحين بالنصر الذي استحقه الصف التاسع
....................
المهم
هذه المباراة حملت اسم ( بطولة المعلم المرحوم أحمد نصار) .
متى وفي أي عام سيكون اسم هذه المبارة ( بطولة المعلم المرحوم الحلونجي اسماعيل ) .؟
ولا أحكيلكم .. وشرف ستي لأصير مدير هالمدرسة على شان تكون ( بطولة المدير المرحوم الحلونجي اسماعيل ).
ولا أحكيلكم ... وشرف ست ستها لستي لأصير مدير التربية والتعليم على شان تكون ( بطولة مدير التربية والتعليم الحلونجي اسماعيل ).
ولا أحتشيلتشوم ... وشرف مرت عمي نجاح لأصير مليونير وأبطل من هالوظيفة كلها .
حلو الواحد يشتغل مليونير ..
هناك 13 تعليقًا:
أكيد هالزمن غريب شوي مش كثير !!
ما شاء الله
معلم مبجل وحويط
لدرجة انه بياخد الكاميرا الشخصية على الصف
رهيب !!
اما بالنسبة لعلامة النصر
فأتمنى أن تكون الصفة الملازمة للأجيال القادمة
وأنا عن نفسي لن اتواسط له
لسبب بسيط
انه كيف بتقدر تعاقب طفل على طموحة بالنصر ؟؟
ـ مبروك للتاسع أ
ــــــــ
أما بالنسبة للتساؤل الغريب في نهاية الخربشة
وشرف مرت عمك نجاح لتطلع من هالمدرسة
ورجلك فوق رقبتك
وقول لاجئ قال
خربشة مخربشة تخربش خربوش
ـــــ
معلومة عن نفسي ..
لا أطيق هذا المبنى الجديد لمدرسة المخيم
أول مرة بعرف انه في اشي اسمو ( كاميرالشخصية ) , ضحكتني كثير ...
مبروك للأخ حلونجي على دخوله سلك التعليم، ونشالله بتربي جيال، بتحب الشهرة والحلويات، والوطن!
الولد الذكي والحلو، بيتاكل من كتر ما هو زاكي:)
بس احذر أن تفضله عن الاخرين،، ولو لا شعوريا،، من تجربة سابقة صارتلي مع صف رابع برضو.. طيب بعدين بحكيلك القصة
المهم يا عزيزي العزيز أنه اذا صحلك شغلة مليونير، ابقى تواسطلنا اياها مع الجماعة
سلام سليم أرق من النسيم
وأعذب من صوت عبد الحليم
هي الناس اللي بتفهم يا أخ ( لاجئ إلى الله أعلم ) .. تعلَم الحكي من هي مش هي
.. ويبارك فيكي إلوهيم يا ست مش انتي ..
وبالنسبة إني أطلع من المدرسة ,, طق وافقع .. راح أطلع بس بخاطري ,, ليش ؟
لإني راح أصير مليونير
كيف ؟
الأيام راح تفرجيك .
ولما أمر عنك وأنا راكب الشيفورليت سفاري مش راح أعبرك يا لاجئ يا ابن المخيمات . وبقى سلملي على سميرة جارتك.
هههههههههه
طيب
ننتقل الان الى التفاصيل
شوف يا سيد
بعد ان وصلتني معلومات من الاجيال المسكينة
لقيت انه الصفوف مخربطة
انت كتبت التاسع أ والثامن جـ
الصفوف هي التاسع ب والثامن ب
غريبة انت كنت هناك ؟؟!!؟؟!!
ثانيا النتيجة 5-1 للتاسع
مش 4-1
ــــــــ
انتقل الى الخبر السعيد وهي مرورك بالشيفورليت عني
بكون سعيد لما بشوفك ذو مقام رفيع يا كبير
بس شو لونها .. خضرا ؟؟
ـــــــ
واتمنى أخيرا لك التوفيق دووم
وأيضا اتمنى ان تصبح مشهور
والشهرة تنالها بالسعي كما أنت
دمت الى الأمام
وأنا لن اقلق على إبني مستقبلا الا بين يديك
الى عزيزنا الحلونجي لقد لاحظت انك حذفت تعليقي السابق واذا كنت قد تضايقت من تعليقي فأنا أسف يا اخي العزيز ولم اقصد الاساءه لك او لمدونتك الرائعه وانما حاولت اللفت الى الفساد في اي وزاره .... كن بخير
لاجئ إلى متى بالنسبة للشوفورليت مش بإمكانك تزاود عليها .. صحيح إنو كرم أخلاقي ما بيسمحلي إني ما أعبرك لما أمر عليك ..بس بوعدك المرة الجاي ما أعبرك والأيام بيناتنا .
العزيز ( الناطق بلسان الباب الباب الآخر)
بالفعل كان كذلك ...
فخلف كل شاشة حاسوب هناك قلب ينبض , قد تجرحه أقل الكلمات ولو خرجت عن حسن نية ..
كان اعتذارك أبلغ من أي كلام ... ولا عليك .
أهديك في النهاية القصيدة الأولى بل الكلمة الأولى من ديوان ( كزهر اللوز أو أبعد )
وبس
يا سلام يا سلام .. الحلونجي صار استاذ .. تطمنت ع ولاد المخيم مبزوط:D
ع فكرة غسان كان استاذ وما كان يلتزم بالمناهج الغبية والقوانين .. زي الواحد مدخل كميرا ع الصف ( سمايلي بيصفر وبريييييء)
بس قد ما سعدنوك بتظل طفولتهم ومشاكساتهم اشي بيفتح نفس الواحد ..
خليك مشاغب
يا عالم يا ناس ( فيها مشكلة إذا أخذت كاميرا على الصف ) ولكم العالم تطور .. وفي شي إسمه هلا ( تكنولوجيا التعليم.. وبإمكاننا أن نعد الكاميرا من الوسائل التعليمية ) ...
بعدين كله ولا لاجئ إلى متى ( بيحكيلي معلم وماخذ كاميرا شخصية على الصف ) يعني كاميرا رويترز مسموحة والشخصية لأ .. وشو تعليقك على ( كاميرا شخصية ) ؟
بعدين يا ست وطن .. اللـه يعينهم لطلابي علي أنا ...
وبالنسبة لغسان كان معلم وأبو إياد صلاح خلف كذلك .. وإبراهيم طوقان .. وعبد اللطيف عقل كذلك ... حتى مستغانمي معلمة مدرسة .. وكمان نجوى كرم .... عادي
المدارس باظت يا جدعان .
وشكراً للجميع .
هيك يعني ،،
بتصدق ..أكتر شي ما بحبهه بالمعلمين انهم بيفضلوا الطلاب الحلوين .. وهذا اللي كان بيصير معي " لا تقلي ذكي ومش ذكي " هو بصف اول وثاني في ذكي ومش ذكي ..اصلا في بالحياة كلها حد ذكي ومش ذكي ..
او يمكن انت عجبك شكله وحكيت يمكن هو راح يزبطلك الصور شوية صح ؟؟
اكيد هيك ..
ذكرتني بايام الاساسية .. كنت بنت صغيرة سمرة ... " ما كانوا اهلي بيدرسوني " لانهم كانوا مشغولين فما كنت اجيب علامات ... وقبل فترة كنت بستعرض بعض الصور اللي التقطت النا واحنا بالاساسية " كانت امي جايبيتها من المدرسة كونها صارت مديرتها " المهم هاي مش قصتنا .. القصة انه يجي 10 صور لبنات صفنا ما لقيت حالي ولا حتى خيالي فيها .. قال شو
just for clever
تحياتي
" صح كمان ذكرتني بقريبي هو كمان صار معلم "
تحياتي مرة تانية
أولاً : لو إنك عندي هلا كان فرجيتك علامة أحمد بالامتحان النصفي وكان عرفتي قديش هو شاطر .
ثانياً : ومستحيل تشوفي الصور اللي التقطتهم كلهم , بس لاجئ إلى متى شافهم كلهم وبتوقع إنه شخص محايد جداً ... اسأليه إذا خليت طفل يعتب علي ...
غير هيك أنا شو إلي دخل إذا انتِ مش كاينة شاطرة وبربورك كاين نازل دايماً وعلى شان هيك ما صحتلك ولا صورة ..( بمزح طبعاً أخت عروبة ) ..
كل الاحترام لوجهة نظرك ... في منها صحيح .. بس صدقاً أنا مش هيك ولا بحب أكون هيك ..
بس أحمد هذا بالذات له معزة خاصة عندي وهذا بعيداً عن جو التدريس ... الحقيقة أن جدة هذا الطفل هي القابلة التي قامت بتوليدي قبل 26 عاما
ً .. وكانت يداها أول من لمسني في هذه الدنيا ... ولكِ أن تسألي لاجئ إلى متى وسيخبرك كم هذه المرأة محبوبة في المخيم وكم بقيت ذكراها عطرة حتى بعد رحيلها .. ولم تقم بتوليدي أنا وحدي بل ومعظم أخوتي يعني ولدت 8 من أصل 11 أخ ... عنجد من حقي أحب ابن ابنها وأحكي هذا الولد ستو اللي ولدتني ...
قديماً قالوا ( لا تشكو بلداً فيها قوابلك ولا وطناً فيه قبائلك )
شكراً لمروركِ
وظلتش بخير
ضليت مبتسمة لحدّ عبارة :" بعد رحيلها "
ياه شو مؤلمة ، كنت لسا مفكرة أكتشف سرّها ، كوني كمان بعشق اكتشاف أسرار الختيارات ،،،، ....
من ناحية معك حق ، فــ معك حقين ..
تحياتي \\
" ما فهمت " ظلتش""
إرسال تعليق